Екібастұз балабақшалары қайта іске кіріседі

Екібастұздағы балабақшалар 19 желтоқсаннан бастап қайта жұмысын бастайды, деп мәлімдеді  қала әкімі Аян Бейсекин.

— Барлық балабақшалар дүйсенбіден жұмысын бастайды. № 1 және № 24 мектептен басқа мектептердің көпшілігі де жұмыс істейтін болады, - деді Екібастұз қаласының әкімі Аян Бейсекин жексенбі күні Instagram желісіндегі тікелей эфирде.

Сондай-ақ, хабар барысында екібастұздықтар жылу берілсе де, пәтерлеріндегі суыққа шағымданды. Бейсекин коммуналдық қызметтер қаладағы жылуды реттеуге қол жеткізгенін, бірақ бұл мәселе «бір күннен астам уақыттың ісі» болғандықтан, жұмыс әлі жүріп жатқанын айтты.

Еске салайық, 27 қарашада Екібастұзда жылу желілерінің қатты тозуына байланысты жылу және ыстық су кең көлемде тоқтатылды. 28 қарашада қалада төтенше жағдай жарияланды. Екібастұздықтардың көпшілігінің үйлеріне жылу тек 4 желтоқсанда ғана қосылды.