Екібастұзда велосипед мінген жасөспірім ажалдан аман қалды

Велосипед мінген жасөспірім  оң жақ қапталдан шыға келген Toyota Land Cruiser көлігінен қашып,  солға қарай бұрылғанының арқасынада жеңіл жарақат алып, ажалдан аман қалды. Егер бағытын өзгертпей, тура соғылғанда қандай күйде болары неғайбыл.

Оқиға бейнежазбасы әлеуметтік желіде тарап кетті, деп хабарлайды  Orda.kz.

Екібастұз  қаласы Мұхтар Әуезов көшесінде  велосипед теуіп бара жатқан 15  жасар баланы Toyota Land Cruiser  жүргізуші қағып кетті, деп растады  Екібастұз полиция департаментінің баспасөз қызметі.

Бейнежазбада мектеп оқушысының велосипедпен кетіп бара жатқаны анық көрінеді. Бұрылысқа жете бергенде  оң жақ қапталдан Toyota Land Cruiser көлігі қатты жылдамдықпен атып шығады. Жасөспірім соққы алмауға тырысып, солға қарай бұрылғанымен, алысқа қашып кете алмады.

Қатты жылдамдықпен жүрген көлік баланы соғып, ұшырып жібергені бақылау камерасына түсіп қалған. 

— 15 сәуірде сағат 15:50 шамасында жол апаты салдарынан денесі көгеріп, сырылған жасөспірім ауруханаға жеткізілді. Дәрігерлердің тексеруінен кейін ол үйіне жіберілді,- деп хабарлады қалалық полиция бөлімінің баспасөз қызметі.

Құқық қорғау органдары өкілдерінің айтуынша, бұл фактіге қатысты тергеп, тексеру жұмыстары жүргізілуде. Сондай-ақ, қосымша сараптамалар тағайындалған.