Екі жыл бойы бөтен адамның жеке куәлігін иемденген алаяқ ұсталды

Екі жыл бұрын жоғалған елордалық азамат табылды, деп хабарлайды Orda.kz тілшісі қалалық полиция департаментінің баспасөз қызметіне сілтеме жасап.

2019 жылдың ақпан айында қалалық полиция департаментіне елорда тұрғыны хабарласып, әпкесінің жоғалып кеткені туралы хабарлайды.

Оның сөзінше, 24 жастағы қала тұрғыны екі сіңлісімен сөзі жараспағандықтан туыстарымен байланысты үзген болып шықты.

Іздеу нәтижелері бойынша, араға екі жыл салып, жоғалған қыздың елордада тіркелген 2 бірдей алаяқтық іске қатысы бар екені анықталды. Іздеудегі азамат бөгде адамның жеке куәлігімен құрылыс компаниялардың бірінде жұмыс істеп жүрген жерінен ұсталды. Аталмыш фактілер бойынша қылмыстық іс қозғалады.

- Қазіргі таңда із-түссіз жоғалған тұрғын анасымен қауышты. Оның бұған дейін елордадағы өзге де осындай істерге қатысы бар-жоғы анықталып жатыр, - деп жазады департамент баспасөз қызметі.