Екі террорлық актіге тосқауыл қойылды – Тоқаев

Қасым-Жомарт Тоқаев Ақордада UAE SWAT Challenge сайысында топ жарған арнаулы қызметтер мен күштік құрылымдардың бір топ офицерін марапаттады, деп хабарлайды Orda.kz.

Ақорданың мәліметінше, Тоқаев арнаулы қызметтер мен күштік құрылымдардың атқарған істеріне тоқталып, екі террорлық актінің жолын кесіп, 22 мың тонна есірткі тәркілегенін атап өтті.

«Былтыр Ұлттық қауіпсіздік комитеті заңсыз әрекеттердің алдын алу барысында жиырмадан астам жедел жауынгерлік іс-шара өткізді. Екі террорлық актінің жолын кесіп, қаскөйлерге тосқауыл қойды. Ұлттық ұлан жасақтары төтенше жағдайлардың салдарын жоюға белсене атсалысты. Ішкі істер министрлігінің құрылымдары ауқымды жұмыс атқарып жатыр. Өткен жылы есірткі өндіретін 64 орын жабылды. 22 мың тонна есірткі тәркіленді. Есірткіні жарнамалаған 7,5 мың сайт бұғатталды. Екі миллиард теңгеден астам қаржыны шетелге шығармақ болған алаяқтардың жолы кесілді. Соңғы үш жылда 8 мыңға жуық түрлі қару-жарақ табылды», – деді президент.

Айта кетейік, жақында Дубайда өткен дүбірлі додаға Қазақстан атынан 12 команда қатысқан. Ішкі істер министрлігінің «Сұңқар» және «Томирис» командалары халықаралық жарыстың күміс жүлдегері атанды. Ал ұлттық қауіпсіздік комитетінің «Арыстан» командасы төртінші орынға ие болды. Мемлекеттік күзет қызметі мен қорғаныс министрлігінің командалары жақсы нәтижелер көрсетті.