Екі қазақстандық фильм Ресейде өткен кинофестивальде жүлделі орынға ие болды

Гатчина қаласында жыл сайынғы және бірегей фильмдерді бейімдеу байқауы, «Әдебиет және кино» халықаралық кинофестивалінің жабылу салтанаты және жеңімпаздарды марапаттау өтті «Қазақфильм» АҚ-ның екі фильмі марапатқа ие болды, деп хабарлайды киностудияның баспасөз қызметі.

Қоюшы-суретші Ермек Өтегеновтың үздік жұмысы үшін халықаралық қазылар алқасының арнайы дипломы «Мұқағали» фильміне (реж. Болат Қалымбетов) берілді.

Үздік сценарий жүлдесі режиссер Дәрежан Өмірбаевтың «Ақын» фильміне берілді.

Еске салсақ, қазақтың белгілі ақыны Мұқағали Мақатаевтың 90 жылдығына арналған көркем картина шайыр өмірінің соңғы жылдарын баяндайды.

«Мұқағали» фильмі 25-ші Таллиндегі «Қара түндер» кинофестивалінде (PÖFF) Әділ қазылар алқасының жүлдесін жеңіп алды. Бұл қазақ киносының тарихындағы Эстонияда алған алғашқы мәртебелі сыйлық. Тамыздың басында «Мұқағали» фильмі Қырғызстандағы қазақ киносы күндерін ашты. Биыл 15 шет елде Қазақ киносы күндерін өткізу жоспарлануда.

Токио кинофестивалінде «Ақын» фильмінің әлемдік тұсаукесері өтіп, қазылар алқасы қазақстандық фильмнен үлкен әсер алып, Дәрежан Өмірбаевқа «Үздік режиссер» сыйлығын табыс етті.

«Ақын» фильмі заманауи технологиялар мен жаппай тұтыну қоғамындағы өнердің рөлі туралы мәселені көтеріп, ақынның басынан кешкендерін баяндайды. 19-ғасырдағы бүлікші ақын Махамбет Өтемісұлының қайғылы тағдыры туралы ой елегінен өткізген көрермен ақын өмірінің қаншалықты қиын да нәзік болғанын аңғарып, қатты тебіренеді.

Биылғы жылы Гатчинадағы кинофестивальдің конкурстық бағдарламасына 35 фильм – кәсіби авторлар мен дебютанттардың туындылары енді. Байқауға әр түрлі елдерден: Ресей, Беларусь, Қырғызстан, Армения, Израиль, Қазақстан және Тәжікстан сияқты ірі атақты студиялар мен тәуелсіз авторлар өз картиналарын ұсынды.

Айта кетсек, «Әдебиет және кино» бірінші ресейлік кинофестивалі Гатчинада 1995 жылы өткен болатын. Содан бері, 20 жылдан астам уақыт бойы ол жыл сайын ресейлік және әлемдік киноның жаңалықтарын ұсынады. Бұл әдеби негіздегі фильмдерге бейімделулер ғана қатысатын жалғыз фестиваль. Кинофестиваль жұмысына киногерлер ғана емес, қазіргі мәдениеттің алтын қорын білдіретін жазушылар да қатысуда.