Екі ел басшысының жанжалына байланысты АҚШ Украинаны қаржыландыруды тоқтатады

Бұл туралы Дональд Трамптың баспасөз хатшысы Кэролайн Левитт Fox News арнасына берген сұхбатында айтты, деп хабарлайды Orda.kz.

Оның айтуынша, АҚШ бейбіт келіссөздерге басымдық беріп отыр, ал Украина президентінің ұстанымы тым ымырасыз болып шыққан. 

«Біз бұдан былай нақты, тұрақты бейбітшілігі жоқ өте алыс елдегі соғыс үшін бос чектерді бере бермейміз» - деді Кэролайн Левитт.

Трамп әкімшілігі баспасөз хатшысының айтуынша, мұндай реакция Зеленский келіспеген мәлімдемелерге жауап болуы мүмкін. Ал егер Украина басшысы мәміле жасағысы келсе, көзқарасын өзгерту керек екен.

28 ақпанда АҚШ президенті Дональд Трамп Ақ үйде Зеленскиймен кездесті. Екі мемлекет басшысының әңгімесі бір-біріне дауыс көтерімен аяқталды.

Зеленский Ақ үйден мерзімінен бұрын кетіп қалды, сирек пайдалы қазбалар туралы келісімге қол қойылмады.

Дегенмен көптеген еуропалық көшбасшылар Украина басшысы мен халқына қолдау білдірді.