Екі басқарма басшысы әлеуметтік желідегі видеодан кейін арыз түсірді

Мұнайлы аудандық кәсіпкерлік және ауыл шаруашылығы бөлімі басшысының міндетін атқарушы Бақтияр Қуанышбектің жиналыс уақытында лауазымы жоғары тұлғаларға қандай сыйлық сыйлайтыны туралы ақпарат айтып жатқан видеосы желіде тарады.

Бұл туралы Orda.kz. хабарлайды.

Видеода Бақтияр Қуанышбек Жанна Тоқбаева мен инвестициялар және туризмді дамыту басқармасының басшысы Венера Мұстапаеваның өзіне деген «жақсы» көзқарастары туралы айтып, оларға «Француз үйінен» бағасы 25 мың теңге тұратын иіссу алып беретінін айтады.

 – Қалың қалай? Не істеп жатырсың? Байланысқа шықпайсың ғой. Әңгімелері кілең сондай болып кетті. Махаббатизм басталып кетті ма? Мен жақсымын олармен. Ертең айлығымды алып «Французский домға» барып, екеуіне 25 мыңнан екі духи алып бермесем. Управлениесіне барып кіріп. 50 мың теңге қайда қалмайды, - дейді Мұнайлы аудандық кәсіпкерлік және ауыл шаруашылығы бөлімі басшысы.

Маңғыстау облысы әкімінің баспасөз қызметі хабарлауынша, видеода аты аталған екі басқарма басшысы құзырлы орындарға арыз-шағым түсірген.

Өз кезегінде бөлім қызметкерлері, «Сыбайлас жемқорлыққа қарсы іс-қимыл туралы» заңды елемейді. Бұл әрекет қылмыстық жауапкершілікке әкеп соғады. Мемлекеттік қызметші Б. Қуанышбектің шындыққа жанаспайтын әңгімесі әйелдердің ар-намысы мен қадір-қасиетіне нұқсан келтіреді.

Осының бәрін ескере отырып, облыстық кәсіпкерлік және сауда басқармасының басшысы Ж. Тоқбаева мен инвестициялар және туризмді дамыту басқармасының басшысы В. Мұстапаева уәкілетті органдардан «Сыбайлас жемқорлыққа қарсы іс-қимыл туралы» Заң мен «ҚР мемлекеттік қызметшілерінің этикалық нормалары мен мінез-құлық қағидаларын одан әрі жетілдіру жөніндегі шаралар туралы» Кодекске сүйене отырып, Б. Қуанышбекке қатысты қатаң шара қабылдауды сұрайды.

Сонымен қатар, олар мемлекеттік қызметшілердің әдеп кодексін бұзғаныны үшін видеода көрінген бөлім қызметкерлеріне қатаң шара қолдануды талап етіп, арыз түсірді.

Арызда сондай-ақ әлеуметтік желілерде моральдық залал келтіргені үшін айыппұл салуды және ресми кешірім сұрау көрсетілген. Қазіргі уақытта бөлім басшысының міндетін атқарушыға қатысты қызметтік тексеру басталды.