«Екі баласын тұншықтырып өлтірген» анаға сот үкімі шықты

Түркістан қаласында  балаларын тұншықтырып өлтірген 31 жастағы анаға сот үкімі шықты.

Бұл туралы Түркістан қалмыстық істер соты хабарлады. 

Түркістан қаласында «екі баласын тұншықтырып өлтірді» деген айыпталған 31 жастағы Бота Хамитқызына 15 жыл түрме жазасы кесілді. Ол жазасын қауіпсіздігі орташа түзеу мекемесінде өтейді.

Судья Дәурет Мадалиев айыпталушыны Қылмыстық кодекстің «Адам өлтіру» бабымен (99-бап) кінәлі деп танып, 15 жылға бас еркіндігінен, өмір бойына педагогикалық және кәмелетке толмағандармен жұмыс істеу құқынан айырды.

Сотталушының қоғамдық қорғаушысы, әкесі сот үкіміне келіспейтінін, апелляциялық шағым түсіретінін мәлімдеді.

Сотта жәбірленуші деп танылған Хамитқызының күйеуі, бақилық болған екі баланың әкесі үкімді онлайн тыңдады. Ол үкім оқылғанда көзіне жас алды. 14 мамыр күні басталған сот процесі алқабилердің қатысуымен өтті.

Сотта айыпталушының созылмалы психикалық аурумен ауырмайтыны, балаларын аффект жағдайда өлтірмегені анықталған.

Естеріңізге сала кетейік,  2024 жылғы 7 ақпанға қараған түні Түркістан қаласында жалға алынған пәтерде «ұйықтап жатқан 5 жасар ұлы мен 4 жасар қызын жастықпен тұншықтырып, қасақана өлтіргені» айтылған. Полиция қылмысқа күдіктіні ертеңіне Шымкент қаласындағы қонақ үйден ұстаған. Бота Хамитқызы сотта айыпты мойындады.