Екі баланы жертөлеге қамап, аш қалдырған өгей әке соттан қалай құтылды?

Жамбыл облысында екі жасөспірім баланы жертөлеге қамап, аш қалдырған өгей әкені облыстық сот алқасының төрағасы 4 жылға сотталғанына қарамастан босатып жіберген, деп хабарлайды Orda kz.

Письмо к президенту telegram-арнасының мәліметінше, оқиға 2024 жылы 9 тамызда Жамбыл облысы Жуалы ауданында болды. Өгей әкесі баланы азаптап, ұрып-соғып жертөлеге ас-сусыз қамап қойған екен. Тіпті ас бөлмені кілттеп тамақ бермей, сарайда жатқызып, мал баққызған. Баланың туған әкесінің айтуынша, екі ұлы хабарсыз кеткен соң, іздей бастаған. Өздері таба алмаған соң полицияға арыз жазған.

«Мен бірінші әйеліммен ажырасып кеткенмін. Екі ұлым соның қолында еді. Екі ұлым хабар-ошарсыз кеткен соң іздеп, полицияға арыз жаздық. Артынша балаларды сайдың арасында аш әрі әлсіз жатқан жерінен бір аптадан соң сол арада мал бағып жүрген ер адам тауып алған. Полицияда балалардан не үшін үйден қашып кеттіңдер деп сұрағанда олар өгей әкесінен көрген қорлықтарын айтып берді. Ең сұмдығы балаларымның осыншама қорлығын туған шешелері көре тұра араша түспеген», – деді әкесі.

Ал осының бәрін көріп, балаларына еш жаны ашымаған анасы Гүлмира Мәденованың аудандық білім бөлімінде жұмыс істейтіні анықталды.

Іс қозғалып, сотқа жеткенімен Жуалы аудандық соты өгей әкені 4 жылға бас бостандығынан айыруға үкім шығарады. Алайда, артынша облыстық соттың сот алқасы төрағасы Нұрмұхамат Абидов оны босатып жіберген.