Екеуі жансақтау бөлімінде: «ҚазАзоттағы» апаттың жай-жапсары белгілі болды

18 шілде күні «ҚазАзот» зауыты аумағында техникалық апат болды, деп хабарлайды Orda.kz.

Маңғыстау облысы әкімдігінің мәліметінше, төрт қызметкер зардап шеккен – барлығы термиялық күйік алған. Екеуі жансақтау бөлімінде, қалған екеуі — травматологияда ем қабылдап жатыр.

Қазіргі уақытта олардың жағдайы тұрақты деп бағалануда, жағдай жергілікті биліктің бақылауында. Компания зардап шеккендерге қажетті көмекті көрсететінін мәлімдеді.

«Зардап шеккендерге көмек көрсету үшін Қазақстан Республикасының бас реаниматологы және күйікке қарсы медицинаның жетекші мамандары жұмылдырылды» деп жазылған хабарламада. 

Апат себебі – жабық кеңістікте ашық отпен жұмыс істеу кезінде еңбек қауіпсіздігі ережелерінің бұзылғанынан болуы мүмкін. Еңбек инспекциясы департаментінің мәліметінше, жұмыс тиісті рұқсатсыз жүргізілген.

Полиция бұл оқиға бойынша ҚР Қылмыстық кодексінің 156-бабы – «Еңбекті қорғау қағидаларын бұзу» бойынша қылмыстық іс қозғады. Жағдайдың мән-жайын анықтау үшін арнайы комиссия құрылды.