«Эйр Астана» оныншы рет Орталық Азия бойынша үздік атанды

«Эйр Астана» әуе компаниясы «Оскар» жүлдесін алды, Питер Фостер компанияның жоспарлары туралы айтты.

«Эйр Астана» әуе компаниясы оныншы рет Орталық Азиядағы үздік атанды.

23 қыркүйекте Лондонда авиация саласындағы беделді марапат – World Airline Awards салтанаты өтті. Оны бүкіл әлем бойынша авиатасымалдаушылардың жұмыс сапасын зерттейтін ықпалды британдық Skytrax компаниясы ұсынып отыр.

Биылғы жылы «Эйр Астана» тағы да Орталық Азия мен ТМД елдерінің ең үздік әуе компаниясы деп танылды және компания тарихында алғаш рет «Үздік борттық қызмет» номинациясын жеңіп алды. Ұлттық тасымалдаушының басшысы Питер Фостер қазақстандық журналистерге табыс, алынған айыппұлдар мен компанияның жақын болашақтағы ауқымды жоспарлары туралы айтып берді.

«Эйр Астана» басшысы ең алдымен тапсырыс берушілерге және авиакомпанияның бүкіл ұжымына марапаты үшін алғысын білдірді. Журналистердің сұрақтарына жауап бере отырып, Фостер оның кетуі туралы қауесетті тағы да жоққа шығарды.

— Мен зейнеткерлікке шыққан адамға ұқсаймын ба? Мен Қазақстанда 17 жыл жұмыс істеп келемін, әрі қарай жұмыс істеуге ниеттімін. Бұған үлескерлер де мүдделі екеніне сенімдімін, - деді ол.

Сонымен қатар, Питер Фостер ұлттық тасымалдаушының алдағы үш жылдағы перспективаларымен бөлісті:

— Бізде өте ауқымды жоспарлар бар. 2025 жылға қарай FlyArystan әуе кемелері паркін 11-ден 25-ке дейін ұлғайтуды жоспарлап отыр, ал Air Astana 62 ұшаққа дейін кеңейтеді. Біз сондай-ақ осы уақытқа дейін DreamLine-ді шығаруды жоспарлап отырмыз.

IPO-ға қатысты Фостер олардың акционері BAE Systems листингілік компания мәртебесіне байланысты ресми түрде түсініктеме бере алмады. Дегенмен, ол «Эйр Астана» IPO-ға шықса, бәрі де ұтатынына сенімді:

  —  Бұл Қазақстан үкіметі үшін шетелдік инвесторларға табысты компанияның үлгісін көрсетуге жақсы мүмкіндік болады. Біздің акцияларды қазақстандықтардың өздері де сатып ала алады. Сондықтан, егер IPO өтетін болса, біз жалпыға бірдей қолдау күтеміз, - деді Фостер.

Питер Фостер сондай-ақ, осы жазда «Эйр Астана» әуекомпаниясының жазаға тартылған жағдайына тоқталды. Оның айтуынша, ұлттық компания олардың акционері және ондай өкілеттіктерге ие болмағандықтан, әуе тасымалдаушыға «Самұрық-Қазына» қоры айыппұл сала алмайды.

  —   Шілде айында біз әсер ете алмаған сыртқы мәселелерге байланысты қиындықтарға тап болдық. Қазақстан билігі рейстің кешігуіне байланысты бізге екі рет айыппұл салды. Олар кезінде қонақүйлер толып кеткендіктен жолаушыларды жатын орынмен қамтамасыз ете алмадық. Осындай келеңсіз жағдайлардың жиынтығы, - деді ол.

Сонымен қатар, «Эйр Астана» басшысы компанияның әзірге ресейлік нарыққа оралу ниеті жоқ екенін, бірақ Ресей Федерациясының аумағында жұмыс істейтін кеңсе мен қызметкерлерді сақтап отырғанын айтты. Тасымалдаушы Түркияға, Ұлыбританияға және Грекияға бағыттарды ұлғайту арқылы жоғалтқан пайданың орнын толтырады.

Қазақстандағы дамуға қатысты Фостер Атырау мен Ақтаудың маңыздылығына тоқталды:

  —  Атырау Эйр Астана үшін де, FlyArystan үшін де маңызды. FlyArystan қазір төрт базаға ие, ал Атырау ең жылдам дамып келе жатқан база болып табылады. Ақтау әуежайы да Қазақстанда өте қарқынды дамып келеді және бұл, әрине, жақсы мүмкіндіктер туғызады.

Әуе компаниясының басшысы екі авиатасымалдаушы да әзірге компаниялар тобы ретінде жұмыс істеуді жоспарлап отыр деп сендірді. Фостер олардың бөлінуін жоққа шығармайды, бірақ жақын арада емес:

— Қазір біз үшін топ болып қалу өте маңызды. Air Astana FlyArystan-ға әртүрлі аспектілерде көптеген қызметтерді ұсынады. FlyArystan экономикалық тұрғыдан тәуелсіз бола бастағанда бөлу туралы айтуға болады, - деп қосты ол.