«Егемен Қазақстан» және «Казахстанская правда» газеттері бірікті

«Егемен Қазақстан» және «Казахстанская правда» газеттері бірікті.

Бұл туралы Orda.kz Ақпарат және әлеуметтік даму министрі Аида Балаеваның Facebook парақшасына сілтеме жасап хабарлады.

– Бүгін ақпарат саласында тағы бір маңызды оқиға болды. Екі негізгі республикалық «Егемен Қазақстан» және «Казахстанская правда» басылымдары біріктіріліп, «Егемен Қазақстан» тәуелсіз акционерлік қоғамы құрылды. Оның төрағасы ретінде біздің елімізге танымал тұлға Дархан Қыдырәлі тағайындалды, - деп жазды Аида Балаева.

Ол өткен ғасырдың басында құрылған 100 жылдық тарихы бар газеттер халықты ақпараттандыру бойынша өзіне жүктелген міндеттерді тиісті деңгейде орындағанын, бірақ ақпараттық технологиялардың қарыштап дамыған дәуірінде дәстүрлі БАҚ өзгеріп отыруы керек екенін атап өтті.

– Екі газеттің бірігуі олардың біреуі жұмысын тоқтатады дегенді білдірмейді. «Казахстанская правда» газеті өзінің брендін сақтайды. Қаржылық қолдау жалғасады. Ең бастысы, ол журналистердің жұмысына кедергі келтірмейді. Менің ойымша, орталықтың екі басылымын ақпараттық-идеологиялық қамту біріктіріліп, сапалы мазмұнмен қамтамасыз етудің тартымдылығы мен әлеуеті артады, - деп толықтырды Ақпарат және әлеуметтік даму министрі.

Газет редакциясында тек әкімшілік ресурстар кесілді. Бұл шығармашылық топтың кірісін ұлғайтуға және редакция құрамының сапасын арттыруға мүмкіндік береді.