Есіктегі егде тартқан вахтерлар балаға қорған бола ма?

Қазан оқиғасынан кейін Татарстан мектептерінде күзет мәселесі көтеріліп, қатаң қадағалауға алына бастады. Бұл елде Республика мектептерінің 11 пайызы ғана күзетпен қамтылған екен. Ал қазақ елінде жағдай қалай? Ата-аналарымыз көрші елдегі дүрбелеңнен соң секем алып қалған секілді.

- Мектептегі балалардың қауіпсіздігі үшін алаңдаймыз. Көрші елдегі жағдайдан соң, расымен де, ойланып қалдық. Балаларымыз қазір онлайн оқып жатыр. Десе де, «Сақтықта - қорлық жоқ» демекші, билік тарапынан бұл мәселенің қарастырылғанын қалаймыз. Мектептерде біліммен қатар баланың қауіпсіздігі де қатар қойылуы керек. Қазан қаласында орын алған оқиға жантүршіктірді. Мұның алдын алу үшін қауіпсіздік мәселесін ата-ана болып, барлық жерлерде көтеруіміз керек. Сондай-ақ қалалық білім ошақтарына қарасты мекемелер де күзет мәселесіне салғырт қарамауы керек деп ойлаймын, - дейді үш бала тәрбиелеп отырған ана Қарлыға Серғазина.

Ата-аналардың бұлайша алаңдауына негіз бар. Неге десеңіз, еліміздің білім ошақтарында күзет жұмысы ақсап тұр. Кез-келген мектеп не балабақшаға барсаңыз, есік алдынан сізді егде жастағы вахтер қарсы алады. Шынтуайтында, оларды мектеп басшылығы баланың қауіпсіздігі үшін емес, мектеп мүлкін қорғау үшін ғана алған.

Осы мәселеге алаңдаған мәжіліс депутаты Андрей Линник:

- Бізде кейбір мемлекеттік мекемелер алынбас қамал секілді, бес метрлік қоршаулармен қорғалып, жауынгерлермен күзетіледі. Олар кез-келген басбұзардың шабуылына төтеп бере алады. Ал мектептер мен мектепке дейінгі білім мекемелерінің ауласына кім көрінген кіре алады, - дейді.

Расымен де, осы мәселені көтеріп, қаланың біршама мектептерінің директорларына хабарластық. Олар бұл сауалға жауап беруден бас тартты. Олардың айтуына сенсек, мектепте мекеме мүлігін түнде қорғайтын күзет пен күндіз келіп кеткендерді тіркеп отыратын вахтер ғана жұмыс істейді. Яғни олардың міндетіне балаларды қорғау кірмейтін көрінеді.

Жалпы, Қазандағы қанды оқиғадан соң, біздің елдегі мектептерде күзет жұмысына қатысты талаптар күшейтіле ме? Білім ошақтарының қауіпсіздігіне кім жауапты?

Иә, біз елімізде мұндай оқиға болмайды деп сенеміз. Десе де, дәл іргемізде орын алған жағдай, ешбір жерде енді қайталанбайды деп толық сеніммен айта алмайтынымыз тағы бар. Бұл жөніндегі сауалымызды Қазақстан Республикасының Білім және Ғылым министрлігі кеңсесіне ресми түрде жолдадық. Енді жауабын күтеміз.

Сабина Зәкіржанқызы