Еңбек министрлігі зейнет жасын қысқарту мәселесін қарастырады

ҚР Еңбек және халықты әлеуметтік қорғау министрлігі әйелдердің зейнет жасын қысқарту мәселесін қарастыруда.

Ведомство басшысы Тамара Дүйсенова өткен аптада зейнет жасын 58 жасқа дейін қысқартуды талап еткен белсенділермен кездесті. Қазір Еңбек министрлігі жанындағы жұмыс тобы азаматтардың табыс деңгейін ескере отырып, зейнетке ерте шығудың түрлі нұсқаларын қарастырып, есеп-қисап жүргізіп жатыр.

— Әрбір әлеуметтік қолдау қаражатты қажет етеді. Біз біраз уақыт ішінде есептеп көрейік, қай нұсқа ең қолайлы болатынын қарастырайық. Неғұрлым қолайлы нұсқаны шешкеннен кейін, біз бұл туралы әйелдерге арнайы  ақпарат береміз, - деді Дүйсенова Сенат отырысында.

Қазір Қазақстанда ерлер 63 жасында лайықты демалысқа шығады. Әйелдердің зейнетке шығу жасы бірте-бірте ұлғайып келеді және 2027 жылға қарай 63-ке дейін көтеріледі.