Джо Байден Омарова туралы: Сәуле Америка халқына баға жетпес болашаққа үміт сыйлайтын еді

АҚШ президенті Джозеф Байден Америка Құрама Штаттарының ақша айналымын бақылау басқармасының басшысы лауазымына өз кандидатурасын алып тастаған Сәуле Омароваға қолдау көрсетті және оған шабуыл жасауды орынсыз деп атады.

CNBC ақпараты бойынша, Джо Байден Сәуле Омарованы Америка халқының атынан болашақтың жарқын көрінісі деп атаған.

– Мен Сәулені қаржылық реттеу саласындағы терең тәжірибесі мен жеке және мемлекеттік секторлардағы бұрыннан келе жатқан құрметті мансабының арқасында, сондай-ақ осы саладағы жетекші ғалым ретінде ұсындым. Тұтынушылар мүддесін және біздің қаржылық жүйе қауіпсіздігі мен тұрақтылығын табанды қорғаушы ретінде Сәуле Америка халқының атынан біздің маңызды жұмысымызға баға жетпес түсіністік пен болашаққа үміт сыйлайтын еді, – деді Байден.

Ол Сәулеге жасалған шабуылдарды «жеке басқа тиісушілік және орынсыз» деп атады және бұл шабуылдар «рұқсат етілгеннен асып кетті» деп атап өтті.

Еске салсақ, Қазақстан тумасы Сәуле Омарова АҚШ қаржы министрлігінің валюталық бақылау департаменті басшысы қызметінен бас тартты.

Бұған дейін оны бұл лауазымға АҚШ президенті Джо Байден ұсынған. Дегенмен, Сенатта өткен тыңдауда Омарова қатаң сынға ұшырады.

Омарова өткен өмірін ақтауға мәжбүр болып, өзінің коммунист емес екенін және оның отбасы мүшелеріне коммунизм әсер етпегенін айтты.

– Мен Сәуле Омарованың Банк реттеушісі басқармасының басшысы лауазымына кандидатурасын қайтарып алу туралы өтінішін қабылдадым, – делінген Байденнің мәлімдемесінде.