Джей Ло Алматыдағы «шегіртке шабуылын» еске алды

Әйгілі әнші Дженнифер Лопес Алматыдағы концерті кезінде мойнына шегіртке қонған сәтті The Tonight Show Starring Jimmy Fallon бағдарламасында еске алды, деп хабарлайды Orda.kz.

Бағдарлама барысында Джей Ло жүргізушімен бірге сол сәттің бейнежазбасын көрді. Әншінің айтуынша, бастапқыда ол өзіне жәндік қонғанын байқамаған, тек сахна жарығына үймелеп жүрген майда жәндіктердің бірі шығар деп ойлаған.

«Бір нәрсе тигендей болды, бастапқыда жай ғана ұсақ жәндік болар деп ойладым. Бірақ ол мойныммен өрмелеп бара жатқанда оның аяқтарын анық сездім. Кішкентай аяқтарымен қытықтап жатқандай болды. Не болса да әнді соңына дейін орындауым керек деп өзімді ұстап тұрдым. Ал оны сілкіп тастаған кезде оның кәдімгідей үлкен шегіртке екенін көріп, шошып кеттім. Тікұшақтай көрінді!» — деді Джей Ло әзілдеп.

Айта кетейік, Дженнифер Лопестің концерті тамыз айында Астана мен Алматыда өткен ең ірі мәдени шаралардың бірі болды.