Дүниежүзілік қатерлі ісікке қарсы күрес күні

4 ақпанда Қазақстанда және бүкіл әлемде Дүниежүзілік қатерлі ісікке қарсы күрес күні атап өтіледі, деп хабарлайды Orda.kz.

Денсаулық сақтау министрлігі атап өткендей, Қазақстанда жыл сайын 40 мыңға жуық адам қатерлі ісікке шалдығады.

Басқарманың хабарлауынша, Қазақстанда онкологиялық ауруларды емдеу және дәрі-дәрмекпен қамтамасыз ету тегін жүргізіледі.

Онкологиялық немесе гематологиялық ауруға күдік туындаған жағдайда емдеу мекемелерінде пациенттерге 18 жұмыс күні ішінде консультациялар мен тексерулер алуға мүмкіндік беретін «Жасыл дәліз» жұмыс істейді.

Денсаулық сақтау министрлігі еске салғандай, ел азаматтары емханаларда онкологиялық скринингтің үш түрінен өте алады:

1. Сүт безі қатерлі ісігінің скринингі (40 жастан 70 жасқа дейінгі әйелдер, 2 жылда бір рет)

2. Жатыр мойны обырына скрининг (30 жастан 70 жасқа дейінгі әйелдер, 4 жылда 1 рет)

3. Тоқ ішек обырына скрининг (50 жастан 70 жасқа дейінгі ерлер мен әйелдер, 2 жылда бір рет).

Сонымен қатар, 2024 жылы Қазақстанда жатыр мойны обырының дамуын тудыратын папиллома вирусына қарсы ерікті екпе жүргізіледі. 11 жастағы қыздар бұл вирусқа қарсы тегін екпе ала алады.