«Думанның соңғы сөзі»: Прокурор 7 жылға соттауды сұрады

Қонаев қаласындағы сотта саяси тұтқын, журналист және «Ne deidi?» youtube арнасының авторы Думан Мұхамедкәрімге қатысты жабық сот отырысы болып жатыр. Прокурор Думан Мұхамедкәрімді 7 жылға бас бостандығынан айыруды және 3 жыл қоғамдық-саяси қызметпен айналысуға тыйым салуды сұрады. 

Бұл туралы құқық қорғаушы Бақытжан Төреғожина өзінің facebook парақшасында жариялады.

 Думан Мұхамедкәрімге 405-баптың 2-бөлігі және 258-баптың 1-бөлігі бойынша айып тағылды.

Думан Мұхамедкәрім 2023 жылдың маусым айынан бастап уақытша қамауда отырған болатын. Оған Мұхтар Әбіләзовтан сұхбат алғаны және бейбіт шерулерге шақырғаны үшін экстремистік ұйымға қатысты және оны қаржыландырды деген айып тағылып отыр.

Сот отырысына оның туыстары мен азаматтық белсенділер келіп, Мұхамедкәрімге қолдау көрсетіп, оны босатуды талап етті.

Бақытжан Төреғожина Думан Мұхамедкәрім келесі сотта соңғы шешуші сөзін сөйлейтінін айтты. 

«Келесі отырыс 1 тамыз күні сағат 15:00-де өтеді, онда Мұхамедкәрім соңғы сөзін айтады», — деді Бақытжан Төреғожина.

Еске сала кетейік, Orda.kz Думан Мұхамедкәрімді жақындары мен белсенділер шулап жүріп ауруханаға жеткізгені жайлы жазған болатын.