Думан Мұхаммедкәрімнің түрмедегі жағдайы өте ауыр – адвокат

Түрмеде отырған журналист Думан Мұхаммедкәрімнің адвокаты оның мекемедегі жағдайына алаңдаушылық білдірді, деп хабарлайды Orda.kz.

Адвокат Ғалым Нұрпейісов қорғауындағы Думан Мұхаммедкәрімнің жағдайын «өте ауыр» деп бағалады. Сондай-ақ ол журналистің 29 тамыздан бері наразылық белгісі ретінде аштық жариялап отырғанын атап өтті. Аштық басталар алдында оның салмағы 69 келі болса, қазір 57 келіге дейін төмендеген.

Адвокат журналистің аштық жариялау себебін түсіндірді.

«6 тамыз күні түстен кейін оның камерасына белгісіз кішкентай зат тасталған. Кейін отшашудың жарылысына ұқсас дыбыс шыққан. Ол осы оқиғаға байланысты шағым жазды. Себебі металл зат көзге немесе құлаққа тисе денсаулыққа зиян келуі мүмкін еді. Думан жабық мекемеде бұл затты кім лақтырғанын білмей, әкімшілікке жүгінген, бірақ нәтиже болмаған», – деді адвокат.

Айта кетейік, маусым айында Думан Мұхаммедкәрім түрмеде қысым көріп жатқанын мәлімдеді.