Дубайда екі қазақстандық «Finiko» пирамидасының негізін қалаушыға шабуыл жасады

Дубайда жаңа жыл түні «Finiko» қаржы пирамидасының негізін қалаушы Эдвард Сабыровқа шабуыл жасалды, деп хабарлайды Orda.kz.

Ресейлік  «Автор i» басылымының мәліметінше, Қазақстан азаматтары Анарбек Түмібаев пен Есболат Кенжеғазы Сабыровтың әйелімен бірге болған вилласына кіріп,  қолма-қол 327 000 АҚШ долларын алып кеткен. Одан кейін екеуі FZ-989 рейсімен Мәскеуге ұшып кеткен.  

Сонымен қатар, ерлі-зайыптылардың денсаулығына ауыр зақым келмегені, тек «жеңіл қорқынышпен» құтылғаны хабарланды.  

«Дубай полициясы құқықтық көмек сұрап Ресей Ішкі істер министрлігіне және Түркияның шекара қызметіне қылмыскерлерді анықтау және ұстау үшін өтініш жолдады» деп жазды «Автор i».  

Сондай-ақ, басылымның мәліметінше, Эдвард Сабыров Қазақстан мен Ресейдің алданған салымшылары мен құқық қорғау органдарынан жасырынып, БАӘ-де жүрген. 2022 жылы оны Интерполдың сұрауы бойынша РФ ІІМ ұстаған, бірақ экстрадиция жүзеге аспаған.  

Шабуылды «Finiko» пирамидасынан зардап шеккен салымшылар наразылығымен байланыстырады, олар миллиондаған долларларын жоғалтқан.  

Orda.kz редакциясы бұл жағдайға байланысты Қазақстан Бас прокуратурасына және Ішкі істер министрлігіне сұрау жіберді.