ДСМ медициналық орталық басшыларын қарызы үшін жазаламақшы

Қазақстанның медициналық ұйымдарында қомақты қарыз жиналып қалған. 400-ден астам медициналық ұйымның жалпы кредиторлық берешегі 82 млрд теңгеге жеткен.

Денсаулық сақтау министрі Ақмарал Әлназарова бұл мәселені тез арада шешу қажеттігін айтты.

«Қазіргі жағдайдың себебі – тарифтерді белгілеу жүйесінің жетілдірілмегендігі, медициналық көмек көлемін анықтау және оларды аумақтық бөлу бойынша ашықтық жоқ»,- деді Әлназарова министрлік алқасында.

Оның айтуынша, денсаулық сақтау министрлігі медициналық көмек көлемін, шығындарды және тарифтік саясатты жоспарлау функцияларын қайтарады. Ал медициналық ұйымдардың басшыларына өз мекемелерінің қаржылық тұрақтылығын қамтамасыз ету тапсырылды, өйтпеген күнде олар жазаланады.

«Кредиторлық берешектің қалыптасуы мен өсуіне жол берген медициналық ұйымдардың бірінші басшыларын 2023 жылы тәртіптік және өзге де жауапкершілікке тартуды тапсырамын»,- деп қосты министр.

Сонымен қатар, бірінші жартыжылдықта босаған қаражатты басым бағыттар бойынша оңтайландыру және қайта бөлу жұмыстарын жүргізуді тапсырды.