«Достық» стансасында 29 миллиардтық жүк терминалы салынады

Жаңа терминал «Достық» стансасының өткізу қабілетін жылына 9 миллион тонна жүкке дейін арттырады, деп хабарлайды Алматы облысы әкімінің баспасөз қызметі.

Алматы облысының әкімі Қанат Бозымбаев Алакөл ауданындағы Достық стансасында жүк терминалын салатын «Dar railInfrastructure» компаниясының өкілдерімен кездесті.

— 230-ға жуық жұмыс орны ашылады. Сонымен қатар, инвестор Алакөл өңірінің әлеуметтік-экономикалық дамуына белсенді атсалысып, халықтың әлеуметтік осал топтары үшін 20 жеке тұрғын үй салуды жоспарлап отыр. Бұл басқа инвесторларға үлгі болмақ, – деді аймақ басшысы.

Құрылысқа жауапты компания жаңа терминалдың станса аумағындағы орны анықтала салысымен дереу жұмысқа кірісуге уәде береді.