Досаевтың жұбайы бір жылда 2,3 млрд теңге тапқан

Алматының бұрынғы әкімі Ерболат Досаевтың жұбайы Гүлнәр Досаева күйеуінен 165 есе көп табыс тапқан. Бұл деректер президент әкімшілігі қызметкерлерінің 2024 жылға арналған кіріс декларациясында көрсетілген, деп хабарлайды Orda.kz. 

Гүлнәр Досаева 2,3 миллиард теңге болатын табысын көрсеткен, ал оның жұбайы, президент әкімшілігі басшысының орынбасары, 14 миллион теңге ғана декларациялаған. 

Президент әкімшілігінің басқа да бірқатар қызметкерлерінің табысы жоқ болса, ал олардың жұбайлары миллиондаған қаражат тапқан.

Мәселен, қауіпсіздік кеңесінің хатшысы Ғизат Нұрдәулетовтің жұбайы 24,9 млн теңге табыс табатынын көрсеткен. Президенттің көмекшісі Қуанышбек Есекеевтің өзінде табыс болмағанымен, оның жұбайы 48,3 млн теңге тапқан. Президенттің кеңесшісі Алексей Цой — 0, ал оның жұбайы — 1 млн теңге көрсетсе, президент әкімшілігінің мемлекеттік инспекторы Батыржан Байжұмановтың табысы — 0,  ал оның жұбайы — 2,6 млн теңге тапқан.

Жаңа ережелерге сәйкес, шенеуніктер енді тек салық салынатын табыстың жалпы сомасын ғана жариялайды. Банк шоттары немесе өзге деректер енді ашық көрсетілмейді. Бұл жаңа жүйе 2025 жылдың соңынан бастап қолданысқа енгізілді.

Айта кетейік, Рудный қаласындағы ERG шахтасында жарылыс болып, жұмысшы зардап шекті.