Досаевпен қоштасу, журналистерге қысым, көлеңкеден шыққан екінші үміткер: Алматы әкімі қалай ауысты

Бүгін Алматыда Ерболат Досаевпен қоштасты. Таңертеңнен бастап әкімдік маңында күшейтілген күзет тұрды. Журналистерге түсірілімге тыйым салынды, полициямен қорқытты. Сол уақытта мәслихат қаланың тағдырын шешіп жатты. Сессия қалай өтті, Досаев не айтты және Президент жаңадан тағайындалған әкімге қандай тапсырмалар жүктеді – осының бәрі туралы Orda.kz таратады.

Таңнан бастап әкімдік алдындағы күзет күшейтілді

Республика алаңын полиция қоршауға алды. Қауіпсіздік қызметінің мамандары Orda.kz журналисіне түсірілім жасауға тыйым салып, фото мен видеоматериалдарды өшіруге мәжбүрледі.

«Түсірілімді тоқтатыңыз!» – деді форма кигендер ызаланып.

Бұл уақытта мәслихат депутаттары жаңа әкімді бекітуге дайындалып жатқан еді.

30 минуттық демократия

Дауыс беру бюллетенінде екі кандидат көрсетілді — Дархан Сатыбалды мен әкімнің орынбасары қызметін атқарған Бейбіт Шаханов. Шахановқа дауыс берген депутаттардың бірі — Тимур Елеусізов — дауыс беру қалай өткенін айтып берді:

«Атмосфера ерекше болды. Депутаттар бірауыздан келісе кеткен жоқ, әркім өз пікірін білдірді. Бұл — тежемелік әрі тепе-теңдік қағидатының бар екенін көрсетті. Мен Бейбітті танимын, онымен жұмыс істедім, сондықтан оның кәсібилігін ескеріп, оған дауыс бердім. Басқа депутаттар Сатыбалдыны қолдады. Әркім өз пікірінде қалды». 

Депутат Тимур Сүйменов сессия күні Президенттің жарлығынан бұрын неге бекітілгенін түсіндірді. Заң бойынша мәслихат жаңа әкімді тек Президент ұсынысынан кейін бекітуге құқылы.

«Бұл Мәжілістегі тәртіпке ұқсас. Үкімет депутаттарға жоба береді, олар қарап, шешім қабылдайды. Мұнда да солай. Мәслихатқа кандидаттар ұсынылды, олар қарап, бірден Президентке ұсыныс енгізді. Бұл — демократиялық қоғамдағы қалыпты тәжірибе». 

Күшейтілген күзетті депутат Премьер-министр Олжас Бектеновтің әкімдікте болуымен байланыстырды. Ал Досаев басқарған жылдары қалада не өзгерді деген сұраққа жауап беруден бас тартты.

Сатыбалды — мәслихат таңдауы

Дауыс беру қорытындысы бойынша мәслихат Дархан Сатыбалдыны ұсынды. Біраз уақыттан соң Президент Қасым-Жомарт Тоқаев жарлыққа қол қойды.

Orda.kz журналистері әкімдік кіреберісінде бірнеше сағат бойы күтіп тұрды. Мәслихат түсініктеме береміз деп уәде еткенімен, баспасөз қызметінен ешкім шықпады.

Кейін Үкімет баспасөз қызметі жиын қорытындысымен бөлісті. Онда премьер-министр Олжас Бектенов Президент атынан бұрынғы әкімге алғыс білдіргені жазылды.

Президент Тоқаев жаңа әкімге қаланың дамуына қатысты бірқатар тапсырма берді: экономиканы жақсарту, инфрақұрылымды жаңарту, жолдарды, экологияны, өнеркәсіпті, туризмді, IT мен креативті салаларды дамыту.

Досаевтың «соңғы» сөзі

Қызметінен кетер кезде Ерболат Досаев бюджет өсуі, қаланы жаңғырту туралы айтып, Президентке  алғыс білдірді:

«Ең алдымен, туған қалама қызмет етуге мүмкіндік берген Мемлекет басшысына шексіз алғысымды білдіремін. Бұл мен үшін үлкен құрмет әрі зор жауапкершілік болды. Соңғы үш жылдан астам уақытым — мен үшін үлкен сын мен маңызды жетістіктерге толы кезең. Бұл кезеңде тұрғындардың өмір сапасын жақсартуға бағытталған түбегейлі өзгерістер болды». 

Досаев Алматының болашағына сенетінін,  заманауи әрі өмір сүруге қолайлы мегаполис болуға тиіс деп санайтынын айтып. Осы сөздермен ол қоштасу сөзін аяқтады.

Дархан Сатыбалды туралы қызықты деректерді   мына жерден оқуға болады.