Досаев Олимпиада жүлдегерлеріне пәтер мен көлік кілтін табыстады

Алматы әкімі Ерболат Досаев Париж Олимпиадасы жүлдегерлеріне пәтер мен автокөлік кілттерін табыстады.

Бұл туралы Алматы әкімдігінің баспасөз қызметі хабарлады.

Ерболат Досаев спортшылар мен жаттықтырушыларды жеткен жетістіктерімен құттықтап, елі үшін жасаған қызметтері үшін алғысын айтты.

Ұлттық құрама сапында өнер көрсеткен алматылық спортшылардың Қазақстан қоржынына көп медаль салғаны қуантады. Таланттарыңыздың, табандылықтарыңыздың және еңбекқорлықтарыңыздың арқасында сіздер маңызды да тарихи жеңіске қол жеткізіп, халықтың ыстық ықыласына ие болып, әлемдік спорттың дамуына үлес қостыңыздар. Сіздер сүйікті істеріңіз бен өз еліңізге деген құрметтің жарқын үлгісі бола білдіңіздер, - деді Досаев.

Қала әкімі Нариман Құрбановқа екі бөлмелі пәтердің, ал Ғұсман Қырғызбаевқа, Назым Қызайбайға, Александра Ле мен Ислам Сәтбаевқа бір бөлмелі пәтердің сертификатын табыс етті. Сонымен қатар, спортшыларға 5 және 4 миллион теңгеден ақшалай сертификаттар және жаңа автокөлік кілттері табысталды. Нариман Құрбановқа демеушілер есебінен тағы бір пәтер сыйға берілді. Сондай-ақ, барлық спортшыларға жол талғамайтын автокөлік сыйға тартылды.

Ал Олимпиадада елдің намысын қорғаған барлық алматылық бапкерлер құрамы мен басқа да спротшылар ақшалай сертификаттармен марапатталды.