Досаев халықтан кешірім сұрады

Алматы әкімі Ерболат Досаев Алматы көшелеріндегі кептеліс үшін халықтан кешірім сұрады.

Алматы әкімі Бостандық ауданы тұрғындарымен кездесуде өзінің және әкімдіктің атынан тұрғындардан кешірім сұрады. Ол қаланы дамытуда инфрақұрылымды реттеудің маңызды екенін атап өтті.

«Неліктен біз биыл екі негізгі жолды жөндеп жатырмыз?  әл-Фараби 2010 жылдан бері, Абай 2012 жылдан бері жөндеу көрмеген. Ал, мамандардың айтуынша, биылғы жылы осы екі жолды жасамасақ, қыстан шыға алмас едік», - деді Досаев.

Бұған дейін алматылықтар әлеуметтік желіде кептелістердің жиілеп кеткеніне шағымданған еді. Мұнымен қоса, Досаевтың отставкаға кетуін талап етіп, 30 мыңға жуық адам петицияға қол қойған. Олар Ерболат Досаев келгелі қалада заңсыз құрылыс көбейгеніне наразы.