Донецк пен Лугансктың ер азаматтарын әскерге күштеп алып кетіп жатыр - жергілікті басылым

Донецк және Луганск Халық Республикасының ер азаматтарын «Отанды қорғау үшін» жиналуға мұрша берместен үйлерінен алып кетіп жатыр. Бұл жөнінде Донбас.Реалии хабарлады.

Жергілікті тұрғындар «мұнда ешкім соғысқысы келмейді» деп желіде жазып жатыр. Жергілікті милиция өз кезегінде үйлерді аралап, әскер жасындағы азаматтарды алып кетіп жатқан көрінеді. Сонымен қатар, тұрғындарға хабарламалар жіберіп, оларды «Отанын қорғауға шақырып жатыр». Донецкте әскери шақыру қағаздарын үйді-үйге таратып жатыр. 20 ақпаннан бастап Луганск көшелерінде жұмылдыруға шақыратын жазба тарататын машина іске қосылды.

«Ер азаматтарды күштеп алып кетіп жатыр. Тельмановтағы барлық жігіттерді алып кетті. Базардағы әйел жаңа ғана айтты. Барлығын. Кәмелет жасқа толмаған баланы қамқорына алған адамды Донецктегі пәтерінен алып кеткен, біздің танысымыз. Бізге де тексерушілер келіп, көршіміз туралы сұрады. Құдайға шүкір ол үйінде жоқ. 15 жастағы баласы үйде жалғыз қалды. Бірден УАЗикке салып алып кетіп жатыр. Үлгергендер киім-кешегін алыпты, бар естігенім осы. Меніңше әркімнің жағдайы қазір әртүрлі болып тұр. «Адами фактор». Бұл жерде ешкім военкоматқа баруға, я соғысуға ниетті емес» дейді басылымның дереккөзі.

Мойындалмаған ЛХР және ДХР республикалары 18 жастан 55 жасқа дейінгі ер адамдарға шығуға елден тыйым салды.

Донбастағы жанжал 17 ақпанда шиеленісе түсті. Содан кейін мойындалмаған республикалар Украина тарапынан тыныштық режимін бұза отырып оқ атылғаны туралы мәлімдеді.

Украина болса бұл хабарламаларды арандату және соғыс қимылдарын бастауға әрекет деп атады. Келесі күні ЛХР және ДХР Ресейге әйелдер мен балаларды эвакуациялауды бастады. Босқындарды шығару әлі де жалғасуда. Мойындалмаған республикалар өз аумақтарына көптеген оқ атылғаны туралы хабарлайды. Бейбіт тұрғындардың өлімі туралы да мәлімдеме пайда болды.

Украинада атыс кезінде екі әскери адамның қайтыс болғаны белгілі, бес әскери адам зардап шеккен.