Донбастан 6 мыңнан астам адам эвакуацияланды - БАҚ

Өткен тәулікте шиеленіскен қақтығыстарға байланысты Донецк халық республикасынан 6,6 мың адам эвакуацияланды.

Донецк халық республикасы Киевтің атқылау салдарынан 6,6 мың адамды эвакуациялауға мәжбүр болғанын, оның 2,5 мыңы балалар екенін мәлімдеді. Ресейлік БАҚ өзін-өзі жариялаған екі республиканы Украина тарапынан атылған оқтың астында қалғаны  туралы хабарлады.

РИА Новости агенттігінің хабарлауынша, Украина қауіпсіздік күштері ДХР-ға артиллерия мен минометтен оқ жаудырған.

«Калибрі 120 мм 38 мина және 122 мм калибрлі 27 снаряд атылды,  деп хабарлайды ДХР-дің МКҚК-дегі өкілдігі» деп жазады басылым.

Ал қазірдің өзінде эвакуацияланған азаматтарды Ресей Федерациясының қақтығыс ошағына жақын аймақтарында қабылдау жүріп жатыр.

Алайда, бір күн бұрын Украина Ұлттық қауіпсіздік және қорғаныс кеңесінің хатшысы Алексей Данилов Донбаста болып жатқан оқиғаларды Ресейдің Украина қарулы күштерін тиісті әрекеттерге итермелеу әрекеті деп мәлімдеді. Ел Президенті кеңсесінде өткен брифингте ол: басып алынған аумақтарды ешкім күшпен азат етпейтінін түсіндірді.

«Біздің елде мұндай бұйрық  болуы мүмкін емес», - деп сендірді Алексей Данилов.

Оның айтуынша,  Ресей Федерациясының Донецк және Луганск облыстарындағы өкілдерінен Украинаға қатысты арандатушылықтар болуы мүмкін.

«Олар біздің әскерге, біздің қызметтерімізге ешқандай қатысы жоқ нәрселерді жасай алады», - деді  Украина Ұлттық қауіпсіздік және қорғаныс кеңесінің хатшысы.

Донбастағы жағдайдың шиеленісуі  17 ақпанда басталды. Келесі күні кешке ЛХР мен ДХР билігі әйелдер мен балаларды Ресейге эвакуациялауды бастады. Ресей тарапы босқындарды қабылдауға дайын екенін мәлімдеді, олардың әрқайсысына 10 мың рубльден төлеуге уәде берілді.  Тиісті жарлықты РФ Қаржы министрлігі жариялады.