Дональд Трамптың соты 25 наурызда басталады

АҚШ тарихында алғаш рет бұрынғы президентке қозғалған іс бойынша сот 25 наурызда басталады. Нью-Йорктегі Манхэттен қылмыстық соты порноактриса Сторми Дэниэлсқа ақы төлеу кезінде қаржылық айла-шарғыға барды деп айыпталған Дональд Трамптың істі тоқтату туралы өтінішін қанағаттандырмады, деп хабарлайды Orda.kz порталы.

Трамптың адвокаттары сот отырысы кезінде істі тоқтатуды немесе оны кейінге қалдыруды сұраған болатын. Қорғау жағының пікірінше, Нью-Йорк сотында процестің әділ өтуіне жағдай жоқ, олар сот алқасы істі жан-жақты қарайды дегенге де сенбейтінін мәлімдеді.

Бұған қоса, Трамп өкілдері АҚШ-тағы президент сайлауы алдындағы тайталас кезінде сот праймеризге әсер ететінін және сайлау процесіне кедергі келтіретінін айтты.

Сот қорғау тарабының өтініштерін орындамады. Журналистерге сұхбат берген Дональд Трамп ешқандай қылмыс жасамағанын айтады.

Тергеу мәліметінше, 2016 жылғы сайлау алдында Трамп адвокаттары арқылы Сторми Дэниелске онымен төсектес болғанын айтпауы үшін 130 мың доллар ақша берген. Ақша заң жүзінде берілген, ол Трамптың адвокат қызметі үшін төлемі ретінде рәсімделген. Нью-Йорк штатында бұл есепті бұрмалау болып саналады.

Трамптың адвокаты Майкл Коэн 2018 жылы "бұрмалау ісі" бойынша үш жыл түрмеге кесілген. Сол кезде президент қызметін атқарған Трампқа еш айып тағылмаған.