Дмитрий Баландин спорттық мансабын аяқтайтынын мәлімдеді

Олимпиада чемпионы спорттық мансабын 27 жасында аяқтады, деп хабарлады Мәдениет және спорт министрлігінің баспасөз қызметі.

Дмитрий Баландин Қазақстан құрамасының бас бапкері Илья Гусаковпен бірге ҚР Спорт және дене шынықтыру істері комитетінің төрағасы Самат Ерғалиевпен кездесті.

Кездесу барысында су спортының қазіргі жағдайы мен дамуы, сондай-ақ, Баландиннің спорттық мансабының соңында жаттықтырушы болғысы келетіні талқыланды.

— Олимпиаданы бағындырған спортшылар бұл бағыттан алшақ кетпей, ел спортының дамуына үлес қосулары керек. Сіздің жаттықтырушы болуға ұмтылуыңыз Қазақстан спортының сіз үшін қаншалықты маңызды екенін көрсетеді деп ойлаймын, - деді Самат Ерғалиев.

Ол Дмитрий Баландиннің жетекшілігімен талай чемпиондар шығатынына сенім білдірді.