Дизель отынына қатысты жағдай қайталанбауы керек - министр

ҚР Энергетика министрі Мағзұм Мырзағалиев Атырау мұнай өңдеу зауытында дизель отынын жеткізу бойынша кеңес өткізді.

Бұл туралы Orda.kz хабарлады.

Кеңесте министр ішкі нарықтағы қазіргі ахуал туралы айтты.

– Тамыз-қыркүйек айларында Қазақстанда дизель отынын тұтынудың нормадан тыс өсуі тіркелді. Бұған өнімнің транзиттік ауыр жүк көліктерімен кетуінің төмен бағасы себеп болды. Бүгінде жағдай іс жүзінде қолмен басқару режиміне көшті. Энергетика министрлігі біздің алдымызға нарықты тез арада тұрақтандыру және жоғары сапалы отынмен қамтамасыз ету міндетін қойды. Күн сайын Шымкент зауытында шамамен 5,5 мың тонна дизель отыны шығарылады, Атырауда - 4,4 мың тоннаға жуық, - деді «ҚазМұнайГаз» басқарма төрағасының орынбасары Данияр Тиесов.

Екі зауыт 14 күн ішінде 133 мың тонна дизель отынын шығарды, бұл жоспардағыдан 4 мың тоннаға артық.

Сонымен қатар, мұнай өнімдері нарығындағы қалыптасқан жағдайға байланысты Атырау мұнай өңдеу зауытын жөндеуді келесі жылға ауыстыру туралы шешім қабылданғаны белгілі болды.

Энергетика министрі мұнай өңдеуші компаниялардың басшыларынан кәсіпорындардың үздіксіз жұмысын қамтамасыз етуді талап етті.

Министр жанармай құю бекеттерінде сатылатын дизель отынының сапасына да тоқталды.

– Мен «ҚазМұнайГаздан» барлық жеткізу тізбегі бойынша жанар-жағармай материалдарының сапасын бақылау жүйесі бойынша ұсыныстар енгізуді сұраймын, - деп қорытындылады министр.