Директордың қызы: сөйлемді ежіктеп оқитын мұғалім қалай жұмысқа кірген?

Қашықтан оқыту кезінде Сарыағаш ауданының мектебінде сабақ беретін мұғалімнің ежіктеп тұрған аудиосы желіде тарады.

Бұл туралы Orda.kz хабарлады.

Бұған дейін директордың оқу ісі жөніндегі орынбасары орысша ежіктеп оқитын мұғалімді «директордың қызы» деген болатын.

Алайда мұны мектеп директоры жоққа шығарып, оның қалай жұмысқа алынғаны туралы айтты.

Садриддин Айни атындағы №8 орта мектебінің директоры Гүлсара Хасанова қазір наразылық тудырған педагог «бала күтімі бойынша демалыста» деді.

Оның айтуынша, оны аудандық білім басқармасы жіберген.

– Ол алдымен тестілеуден өткен. Сосын екінші тур – сұхбаттасу болды. Оны басқа мектепте өткізген. Ал маған ол аудандық білім бөлімінің жолдамасымен келді. Сөйтіп, оны жұмысқа алдым, - деді Хасанова.

Анықталғандай, орысша ежіктеп сабақ өтіп тұрған мұғалім дипломында орыс тілі, орыс әдебиеті және педагогика сияқты салалық пәндер бойынша «өте жақсы» деген баға тұр.