«Діни басқармадағы жанжал»: Бас имам мас күйінде көлік айдап ұсталды

Қостанай облысының бас имамы Бақытбек Тәжімбеттің түнгі клубтың жанында Toyota Highlander көлігін мас күйінде басқарғаны үшін ұсталды.

Бұл туралы ҚМДБ арнайы мәлімдеме жасады.

Бақытбек Тәжімбет 15 тәулікке қамалып, 7 жылға жүргізуші куәлігінен айырылды. Ал ҚМДБ өз мәлімдемесінде имамды қызметінен босатқандарын хабарлады.

«Діни басқарманың қызмет жүйесінде заң нормаларын және дін қызметкері этикасын өрескел бұзатын жеке тұлғалардың діни салада жұмыс істеуіне моральдық тұрғыдан құқығы жоқ. ҚМДБ дін қызметкеріне лайықсыз әрекет жасаған Бақытбек Тәжімбетті Қостанай облысының бас имамы қызметінен босатты. Қазақстан мұсылмандары діни басқармасы болған оқиғаны үлкен өкінішпен қабылдап, еліміздегі мұсылман жамағатынан кешірім сұрайды. Алла Тағала баршамызды жамандық пен өкінішті істерге жетелейтін нәпсі қалауының кесірінен сақтағай», — деді ҚМДБ арнайы мәлімдемесінде.

Бақытбек Тәжімбет 1983 жылы Қызылорда облысында дүниеге келді. Түркістандағы «Хасан Оралтай» медресесін, Шымкенттегі «Қамар» медресесінде оқыды. Артынша Алматыдағы медреседе және Стамбұлда білім алды. 2015 жылы Қостанай облысының бас имамы болды. Үйленген, екі баланың әкесі.