Динара Құлыбаева ҚБТУ-дың мемлекетке берілуіне қарсы шықпақ

4 наурызда Қазақстан-Британ техникалық университеті (ҚБТУ) мемлекет меншігіне өтті. Ол «Қайтарылған активтерді басқару компаниясының» (ҚАБК) балансына берілді. Келесі күні 2018 жылдан бері университетке иелік еткен NNEF қоғамдық қоры (бенефициары – Динара Құлыбаева) Orda.kz-тің сауалына жауап беріп, оқу орнының тағдырына қатысты мәлімдеме жасады.

Қордың айтуынша, 27 ақпаннан бастап ҚБТУ-дың 100% акциясы ҚАБК-ға тиесілі. Бұл сот шешімі негізінде қабылданған, яғни қордың еркінен тыс жүзеге асқан. Алайда NNEF университетті заңды түрде иеленгенін мәлімдеді.

Қор өкілдері КБТУ-ды дағдарыс жағдайында қабылдағанын атап өтті. Сол кезде университеттің шығыны – 2,7 млрд теңге, студент саны 1,9 мыңға жетпейтін. Оқытушылардың көпшілігі қосымша жұмыс істеуге мәжбүр болды. ЖОО-да барлығы 16 білім беру бағдарламасы ғана болып, олардың кейбірі (соның ішінде Қазақстандық теңіз академиясы мен Лондон экономика мектебі) жабылу алдында тұрған.

«Мұнай-газ бағыты бойынша кейбір техникалық мамандықтарға студенттер қабылданбаған, бұл аталған бағдарламалардың лицензиясынан айырылуына әкелуі мүмкін еді. Барлық техникалық және инженерлік желілер апатты жағдайда болды, олар құрылыстан бері жөндеу көрмеген. Шатыры қайта қалпына келтіру мен күрделі жөндеуді қажет етті, лифтілер істен шыққан, санитарлық тораптар техникалық тұрғыдан жарамсыз еді, еден, терезе, есік, баспалдақ секілді ішкі әрлеу жұмыстары мүлде назардан тыс қалған», – деп атап өтті NNEF.

Университетті осындай жағдайда қабылдаған қор оны дағдарыстан шығару жоспарын әзірледі. Қысқа уақыт ішінде КБТУ сапалық жаңа деңгейге көтерілді. Студенттер саны 7,6 мыңға жетті, білім беру бағдарламаларының саны 68-ге дейін артты, екі жаңа факультет ашылды. Шамамен 600 түлек Қазақстанның және әлемнің жетекші компанияларында беделді жұмысқа орналасты. Университет бірнеше халықаралық агенттіктің аккредитациясын алып, онда бірқатар маңызды жобалар іске қосылды.

- Smart Field Airankol оқу онлайн-платформасы «Каспий Нефть» АҚ-мен бірлесіп іске қосылды;  
- Орталық Азиядағы алғашқы оқу кен орны Smart Field Airankol полигонының базасында құрылды;  
- Инновациялық ғылыми жобаларға арналған 35 зертхана ашылды;  
- Алматы әкімдігімен бірлесіп, Қазақстандағы алғашқы Smart City зертханасы іске қосылды.  

«ҚБТУ ұлттық және халықаралық рейтингтерде көш бастап тұр. Ол Қазақстандағы үздік 5 техникалық жоғары оқу орнының қатарына кіреді және халықаралық QS рейтингі бойынша Орталық Азия мен Шығыс Еуропадағы үздік 30 университеттің бірі», деп мәлімдеді NNEF. 

Қазіргі уақытта КБТУ Ұлыбританияның беделді жоғары оқу орындарымен серіктестік орнатып, ірі кәсіпорындар мен шетелдік компаниялармен (соның ішінде Chevron, Schlumberger, «Яндекс» және басқа да ұйымдармен) бірлескен зертханалар ашты.  

Қор өкілдері акционерлердің басты мақсаты пайда табу емес екенін атап өтті – олар ешқашан дивиденд алмаған, ал университет кірісін толықтай жаңғырту мен жөндеуге қайта инвестициялаған. Соңғы жеті жылда NNEF университет инфрақұрылымына 11 млрд теңгеден астам қаржы құйды, ал студенттердің әлеуметтік жағдайын жақсартуға тағы 7 млрд теңге бөлді. Жалпы, қор Қазақстанның білім беру жүйесіне 250 миллион доллардан астам инвестиция салды.  

NNEF КБТУ-дың мемлекет меншігіне беру туралы сот шешімін заң аясында даулауға ниетті екенін мәлімдеді. 

«Біз ҚБТУ-дың тұрақты дамуын қамтамасыз ететін ұзақ мерзімді стратегияны ұстанамыз. Сондықтан университеттің жетістіктері мен табысына әрі қарай инвестиция салуға дайынбыз. Осыған байланысты, өз құқықтарымызды қалпына келтіру үшін заң аясында барлық қажетті шараларды қабылдаймыз», деп жауап берді қор Orda.kz сайтының ресми сұранысына.