Димаш Құдайберген Қарағандыда қаза тапқан кеншілер отбасына 20 миллион теңге аударды

Танымал қазақстандық әнші Димаш Құдайберген Қарағандыда қаза тапқан кеншілер отбасына 20 миллион теңге аударды.

Бұл туралы ақын, журналист Бауыржан Бабажанұлы Instagram парақшасында жазды. Оның айтуынша, ол бұл ақпаратты мүлде кездейсоқ естігенімен, игі істі қазақтың басқа қайраткерлері де жалғастырады деген үмітпен жария етуді жөн санаған.

«Қарағандыдағы Костенко атындағы шахтада қаза тапқан 46 адамның қайғысы әлі ұмытыла қойған жоқ. Мемлекет те, жеке кәсіпкерлер де олардың отбасыларына көмек қолын созуда. Белгілі әнші Димаш Құдайберген де оларды назардан тыс қалдырған жоқ. Кеше ол «Әкелері сол апатта қайтыс болған кәмелетке толмаған балалары бар 20 отбасыға бір миллион теңгеден аударды. Мен бұл хабарды кездейсоқ естідім, Қанат (Димаш Құдайбергеннің әкесі) растады» деп жазды Бауыржан Бабажанұлы.

Ақша «Қорғау» көміршілер кәсіподағы» қоғамдық бірлестігінің есепшотына аударылғаны хабарланды.

Естеріңізге сала кетейік, 28 қазанда Қарағанды ​​облысындағы Костенко атындағы шахтада жарылыс болып, 46 кенші қаза тапқан болатын.

Мемлекет басшысы Қасым-Жомарт Тоқаев Қарағанды ​​облысындағы кеншілердің қазасына байланысты көңіл айтып, «АрселорМиттал Теміртау» компаниясымен ынтымақтастықты тоқтатуды тапсырды. Кейін үкімет «АрселорМиттал Теміртауды» Қазақстан еншісіне беру бойынша мәміленің аяқталғанын хабарлады.

Бұған дейін «АрселорМиттал Теміртау» компаниясы Костенко атындағы шахтада қаза тапқан кеншілердің 41 отбасына он жылдық жалақысын төлеп берген.