Димаш Құдайберген MTV рейтингісінде сұранысқа ие 10 әншінің бірі

Ғажайып дауыс иесі  Димаш Құдайбергеннің «Across Endless Dimensions»  әніне жазылған  бейнебаян MTV USA апталық рейтингісінде көш бастады. Бұл жаңалықты әлемге танымал қазақ әншісі өзінің  Instagram парақшасында хабарлады.

— «Across Endless Dimensions» атты әніме түсірген бейнебаяным бүгін MTV USA рейтингісінде бірінші орынға ие болды. Дауыс бергендеріңіз үшін алғысым шексіз. Сіздер мені әрқашан қолдап жүресіздер. Рахмет,  деп жазды Димаш.

Димаш Құдайбергеннің жанкүйерлері бұл жаңалыққа қатты қуанып, сүйікті әншілерін жаппай жеңісімен құттықтап жатыр.

 «Құттықтаймыз! Сен жеңіске әбден лайықсың» , «Жеңісің құтты болсын! Бағындырар шыңдарың әлі алда», «Сен кез келген жоғары деңгейлі марапаттарға лайықсың. Біз сен үшін қуаныштымыз», «Димаш қуанса, біз де қуанамыз. Жеңісміз құтты болсын»  деп жазды оның  табынушылары.

Friday Livestream MTV бағдарламасының жүргізушісі Кеван Кенни  қазақтың ерекше дауысты талантын  құттықтап,  тілегін білдірді.

— Димашты  рейтингте көш бастауымен және MTV-дегі  сұранысқа аса  ие үздік он әртістің қатарына кіруімен құттықтаймын! ,  деп жазды ол Twitter желісінде.

Бүгінде Димаштың аталған  бейнебаяны YouTube кеңістігінде 2,5 млн астам қаралым жинады.