Димаш Құдайберген қазақ тіліне қатысты мәлімдеме жасады

Танымал әнші Димаш Құдайберген қазақстандықтарды қазақ тілін құрметтеуге және мақтан етуге шақырды.

Бейне хабарлама оның Instagram парақшасында пайда болды. Жазбада ол қазақстандықтарды мемлекеттік тілді бағалауға шақырады. Әнші азаматтардың ана тілінде сауатты, еркін сөйлеуін армандайтынын айтты.

«Бізден басқа ешкімге керегі жоқ. Қазір бірнеше тіл білу керек, бірақ қазақ үшін ана тіліңді білмеу – ұят» деді Димаш Құдайберген.

Ол шетелде қазақ тілінде сөйлей отырып, өз отандастарына, туған тіліне деген құрметін білдіретінін баса айтты.

«Тіліміз таза болып, өз жерімізде құнсызданбауы керек. Осыған біздің жастар жұмыс істеуі керек деп ойлаймын. Қазақ тілін үйрене бастаған қандастарымызға көмектесейік, түзетейік, қолдайық. Қазақстан атанған елімізде мемлекеттік тілде, ана тілімізде сөйлеуіміз керек. Ана тілімізді мақтан етейік» деп қосты әнші.