Әділет министрлігі «Ел тірегі» партиясын қабылдамады

6 қаңтарда бірнеше адамнан тұратын бастамашыл топ Нұр-Сұлтандағы әділет министрлігі кеңсесіне «Ел тірегі» деп аталатын жаңа саяси партия құру ниеті туралы ескертуін тапсырды, деп жазады Азаттық радиосы.

Бастамашылдар өтінішінде Қазақстанның барлық облысынан және республикалық маңызы бар қалалар мен астанадан мыңнан астам адам партия құруды қолдағаны айтылған.

Бастамашылар Қазақстанның «Саяси партиялар туралы» заңының 6-бабына сәйкес партия құру ниетін білдірген. Олар бастамашыл топтың және партияны ұйымдастыру комитеті мүшелерінің тізімін өткізіп, тіркеуші орган – әділет министрлігінен бір тәулік ішінде ескертуді қабыл алғаны туралы құжат беруді талап еткен.

Әділет министрлігінің тіркеу қызметі және құқықтық қызмет департаменті арнайы хатында «Ел тірегі» партиясын құру туралы бастамашыл топтың ескертуін мақұлдамай, кері қайтаратыны айтылған. Департамент директорының міндетін атқарушы Евгения Холмецкая қол қойған хатта бастамашыл топ тізімінде «қайтыс болған адамдардың және статусы белгісіз кісілердің» аты-жөндері жазылған делінген.

Бастамашыл топ заңгері Нұрсұлтан Ермаханов Азаттыққа бұл жауабы үшін әділет министрлігін сотқа беретіндерін хабарлапты.

"Біріншіден, тізімдегілердің арасында қайтыс болған адамдардың аты-жөні жоқ. Екіншіден, министрлік партия құру бастамасына заңсыз қарсылық білдіріп отыр. Біз халықтық партия боламыз деп жарияладық. Сондықтан желілерде әр қадамымызды жариялап отырамыз", – деді ол.

«Ел тірегі» деп аталған жаңа партия құрылатынын бастамашыл топ екі ай бұрын ескерткен. Бастамашыл топ қатарында алдағы мәжіліс сайлауында кандидаттар тізіміне «Нұр Отан» партиясының бұрынғы мүшесі Нұржан Әлтаев та бар. Жаңа партия құратынын жариялаған соң көп ұзамай Әлтаев «Нұр Отаннан» шығарылып, парламенттің төменгі палатасы – мәжілістегі депутат мандатынан айырылған еді.

Қазақстан заңына сәйкес саяси партия құру үшін бастамашыл топ партияның құрылтай съезін өткізіп, кемінде 20 мың адамның қолын жинауы керек.

Қазіргі кезде Қазақстанда ресми тіркеуден өткен 6 партия бар, солардың бесеуі 10 қаңтарда өтететін мәжіліс және мәслихат сайлауына қатысады.