Әділет министрі Мемлекет басшысының қабылдауында болды

Мемлекет басшысы Қасым-Жомарт Тоқаевқа Марат Бекетаев Әділет министрлігінің өткен жылы атқарған жұмыстарының негізгі қорытындылары жайында баяндады, деп хабарлайды Қазақстан Республикасы Президентінің ресми сайтына сілетеме жасап, ORDA.

Марат Бекетаев Президентке заң жобаларының әзірлену барысы, оларға құқықтық сараптама беру жайында баяндады. Сонымен қатар бизнес өкілдері мен азаматтарға құқықтық көмек көрсету мәселесі бойынша қолға алынған жұмыстар жөнінде де ақпарат беріп өтті.

Әділет министрінің айтуынша, бүгінгі таңда адвокаттардың және заң жөніндегі кеңесшілердің қызметін реттеу, олардың жұмысын цифрландыру, аталған сала мамандарының кәсіби біліктілігін арттыру, тәртіптік функцияларды дамыту мақсатында бірқатар бастамалар іске асырылып жатыр екен. 

Кездесу соңында Қасым-Жомарт Тоқаев Марат Бекетаевқа заң жобаларын дайындау жұмыстарын сапалы жалғастыруды, азаматтар мен кәсіпкерлерге құқықтық көмек беру тұрғысындағы бастамаларды жоғары деңгейінде атқару сияқты нақты тапсырмалар берді.