Дикий Арманның қамауға алу мерзімі тағы 2 айға ұзартылды

Дикий Арман лақап атымен танымал Арман Жұмагелдиевтің қамауға алу мерзімі тағы екі айға ұзартылды.

Бұл туралы Алматы қалалық сотының баспасөз қызметі хабарлады.

Маусымның 3-і күні Алматының ауданаралық тергеу соты тергеу өтінішін қарап, Арман Жұмагелдиевті қамауға алу мерзімін 7 тамызға дейін ұзартқаны хабарланды.

Дикий Арманның ұсталғаны 7 қаңтарда белгілі болды. Ол бес адамнан тұратын қылмыстық тобымен бірге Алматыда қаңтар оқиғасы кезіндегі арнайы операцияда ұсталды. Ұстау кезінде күдіктілерден әртүрлі маркалы және калибрлі төрт автомат, оқ-дәрі, суық қару және брондалған көлік тәркіленді.

Бұған дейін Бас прокуратура Арман Жұмагелдиевтің қанша рет және қандай қылмысы үшін түрмеге жабылғанын айтқан болатын. Алғаш рет 2005 жылы 1 тамызда Шымкент қаласы Әл-Фараби аудандық сотының қаулысымен қылмыстық жауапкершілікке тартылған.

Сондай-ақ, Дикий Арманға тағылған қылмыстарға қатысы бар деген күдікпен Алматы қаласы мәслихатының депутаты Қайрат Құдайберген де ұсталды. Тергеу деректері бойынша, ол Жұмагелдиевпен бірге «Қазақстан» қонақ үйінде халық жиынын ұйымдастырып, Жұмагелдиевтің төңірегіне топтасып, оны қолдап, билікке ортақ талаптар қоюға шақырған, содан кейін олардың митингіге жиналуын ұйымдастыруға қатысқан.