«Дикий Арманмен» жоспар құрды деген депутат не болғанын айтып берді

2 қаңтар күні сұйытылған газ бағасына қатысты басталған бейбіт шеру Қазақстанның бірнеше қалаларында жалғасты. 5 қаңтарда Алматының орталық алаңында да наразылық шеруі өтті.

«Дикий Арман» лақап атымен танымал Арман Жұмагелдиев халық алдына шығып, жиналғандарды өзіне қаратуға тырысты. Бірақ қаумалап, шулаған жұрт оны тыңдамады. Әлеуметтік желілерде Арманның сөзін тыңдамаған азаматты теуіп жіберген сәті де жария болды.

Бейнежазбадан қонақүйде жиналған сәтте Арман Жұмагелдиевтің қасынан Қайрат Құдайбергенді байқауға болады. Әлеуметтік желілерде «депутатты тергеу керек» деген пікірлер жазылып жатыр. Осыған байланысты Қайрат Құдайберген Instagram парақшасында жазба жариялап, алаңда не болғаны туралы айтты.

– Қазақтың жақсы сөзі бар: «Ақты ақ, қараны қара деген ұтады». Осыдан 5 күн бұрын құқық қорғау органдары елде аты шулы Арман Жұмагелдиевті (лақап аты «Дикий Арман») қамауға алды. Арман туралы бұрын естігенмін, инстаграмда да парақшасы «рекомендованные»-дан жиі шығып тұратын,  бірақ онымен таныс болмадым. 6 қаңтар күні күндіз Арманмен бірінші рет тәуелсіздік алаңында кездестік және бірге тұрып адамдарды сабырлыққа, провокацияларға берілмеуге шақырдық. Ол адамдарды тек бейбітшілік митингке, үкіметпен сөйлесуге шақырды. Бірақ провокаторлар пайда болып оны алаңнан басқа жағына алып кетті, мен тұрған орнымда қалдым. Қасыма елдің ішінде жүрген бірнеше жігіттер келіп: «Аға, мына жердегі провокаторлар сізді өлтіріп кетуі мүмкін сізді көлігіңізге дейін шығарып салайық» деді. Оларға мың да бір рахмет! Мен үйге барып, киім ауыстырып алаңға қайта шықтым. Интернет жоқ. Уатсап істемейді. Бауырларыма қоңырау шалып дружинаға 70-тен аса жігіттерді жинадым, оларға @azamat.ospanov.k бауырымның тепсе темір үзетін 30 дай спортсмен достары  қосылды. Оны естіген Арман бауырымыз жақсылықта басымыз бір болсын деп өзінің жүзден астам жігіттерімен келді.

– Осы 200ден астам  батырлармен, митингте жүрген адамдардың беттерін бұру үшін, қайта алаңға шықтық. Алаңда адамдарды сабырлыққа, мейірімділікке, бейбітшілікке шақырған кезде, провокаторлар Арманға бутылка, таяқ, тас лақтыра бастады. Мені таныған ел өзі басқа жаққа алып кетті, ал Арманды аямай сабады, біреу арттан келіп таспен басын жарды. Одан кейін Арманның жігіттері (оның арасында біздің де еріктілер бар) емханаларды қорғауға алды, тегін азық-түлік таратты, мародерлерді ұстады. Арманның қандай қылмыстар жасағанын мен білмеймін, бірақ бұл ситуацияда өзін ер ретінде көрсетті. Бұл жазбаны шығармай тұрып маған көп адам хабарласып, сен депутатсың ғой, ал Арман «криминальный авторитет», қазір сен оның ОПГсында барсың деп өзіңе де жала жабады, онымен сөйлесе берме, деп маған ақыл айтқан. Бірақ қазағым «Жақсының жақсылығын айт, мейірі тасысын, жаманның жамандығын айт, құты қашсын» деп бекер айтпаған. Сол себептен көргенді ешбір қорықпай және саясатты қоспай ашық айтып отырмын! Намысты, жігерлі қазақтың батырлары көп болғай! – деп жазды Қайрат Құдайберген.