Депутат премьер-министрдің отставкаға кету керектігін айтты

Мәжіліс депутаты Жұлдыз Сүлейменова Қазақстан премьер-министрі Әлихан Смайылов отставкаға кету керек деп есептейді.

Бұл туралы депутат журналист Нартай Аралбайұлының YouTube-арнасына берген сұхбатында айтты.

– Мемлекет басшысы жақсы сын-пікірін айтты. Менің ойымша, бүгінгі таңда министрлердің ауыс-түйісі болды. Бірақ, түбегейлі үлкен ауысуды біз Конституция аясында Мәжіліс сайлауынан кейін күтеміз. Мәжіліске сайлау енді басталайын деп жатыр. Біз үкіметімізді тарқатып алып, Мәжіліс сайлауын бастасақ, бұл қоғамдық жағынан дұрыс емес. Оған өзінің жіберген қателіктерін толыққанды түзеуге мүмкіндік беру керек. Бір жарым айда жаңадан келген үкіметке заң аясында мүмкіндік беріп, заңды орындауымыз қажет. Мен солай ойлаймын, – деді депутат.

Сонымен қатар, ол үкіметтен бөлек премьер-министр Әлихан Смайыловқа қатысты және оның отставкасын қолдап сөз қозғады.

– Жеке өзім айтатын болсам – біз Алматы қаласындағы спорт мектебінің жабылмауына қатысты мен, депутат Нұрымова, депутат Авершин сауал жолдадық. Сол сауалға премьер-министрдің өзі «жабылмайды» деп жауап берді. Бірақ, бүгінгі таңда олай болмай тұр. Әлі де мектепте сабақ басталған жоқ, әлі де лицензиясы қайтарылған жоқ. Осы фактордың өзі менің ол кісіге сенімімді арттырмайды, – деді Сүлейменова.

Журналистің « Демек қалдырмау керек деп есептейсіз бе?» деген сұрағына ол «Иә» деп жауап қайтарды.