Депутат Бас прокуратурадан «АрселорМиттал Теміртауды» тексеруді сұрады

«Аманат» фракциясынан сайланған Мәжіліс депутаты Ерлан Сайыров «АрселорМиттал Теміртау» 12 жергілікті компанияға 700 миллион теңгеге жуық қарыз екенін айтты.

Бұл туралы Мәжіліс депутаты Ерлан Сайыров депутаттық сауалында айтты.

«Тек Теміртау қалалық кәсіпкерлік және қызмет көрсету саласы қызметкерлерінің кәсіподақ ұйымының мәліметіне сүйенсек, «Арселлор Миттал Теміртау» серіктестігі жергілікті 12 кәсіпкерге 700 миллион теңгеге жуық қарыз. Шындығында қазақстандық фирмалар алдындағы қарызы он есе көп», – дейді Сайыров Бас прокуратураға жолдаған депутаттық сауалында.

Оның айтуынша, «АрселорМиттал» жеткізілген тауарлар мен көрсетілген қызметтер үшін төлемді кешіктіру арқылы қазақстандық бизнес есебінен тегін несиелеудің зиянды тәжірибесін дамытқан.

Қазір бұл компания үкіметке жеткен көптеген шағымнан кейін де көп жылдар бойғы қарыз өтеу кестесін жасамай отыр», – деп қосты депутат.

Ол сондай-ақ мердігерлік ұйымдарда жұмысшылардың жаппай кетуі байқалып жатқанын, өйткені қазақстандық кәсіпкерлер жұмыс беруші ретінде өз міндеттемелерін бұзбай, жұмыс орындарын сақтап қалуға тырысып, жалақы төлеу үшін несие алуға мәжбүр екенін айтты.

«Лакшми Миттал түрлі қитұрқылар арқасында Қазақстанның ұлттық меншігін ешбір қиындықсыз, бекер алғаны белгілі. Зауыт мүлкі оған берілгеннен кейін барлық қарыздар «Қармет» мекемесінде қалды. Нәтижесінде көптеген жеткізушілерді 90-шы жылдардағы дәстүр бойынша «лақтырып» кетті», – деп жазды Сайыров.

Оның пайымдауынша, жеткізуші кәсіпкерлер дәл осындай жағдайдан қорқады. Сондықтан депутаттар жеткізушілер алдындағы берешегін қасақана төлемеген «АрселорМиттал Теміртау» компаниясын тексеруді Бас прокуратурадан сұрап отыр. Сондай-ақ аталған компаниялардың тауарлары мен қызметтерін, отандық жеткізушілер мүдделерін үкімет деңгейінде қорғау сұралды.

Әйтпесе, Сайыровтың айтуынша, жұмыссыздар армиясының көбейіп, әлеуметтік шиеленістің күшею қаупі бар.