Депутаттың ұлы 15 жастағы баланы көлікпен қағып кеткен

Ақтөбе қаласында жоғары жылдамдықпен келе жатқан көлік 15 жастағы мектеп оқушысын қағып кеткен. Марқұмның жақындары кінәлілер тиісті жазасын алсын дейді.

Астана телеарнасының хабарлауынша, 3 желтоқсан күні кешке әпкесінің үйіне кеткен марқұм Әділеттің жақындары оның өліміне әлі сене алмай отыр.

Белгілі болғандай, жалғызбасты ана Нұрзаданың екі баласы болған, оның кенжесі – Әділет.

Анасының айтуынша, 10-сыныпта оқыған Әділет информатикадан түрлі олимпиадаларға қатысып, ІТ маманы болуды армандаған.

Қан жұтқан ана баласының өліміне кінәлілер жазадан жалтарып кете ме деп қорқады.

«Көліктен түскенде, ол адам жасаған ісіне өкінбеген де, телефонын алып біреуге хабарласа бастаған. Тіпті жанына да бармапты. «Жас бала жүгіріп шықты, қазір есін жинап, тұрып кетеді» деген екен. Тиісті жазасын алып, қамауға алынса деймін» деді марқұмның анасы Нұрзада Ашибаева. 

Жол апаты қала орталығында орын алып, видеоға түсіп қалған. Артынша әлеуметтік желі де тарап кеткен.

Куәгерлердің айтуынша, екі көлік жарысып келе жатқан. Көлік жоғары жылдамдықта жасөспірімді қағып кеткен. Соққыдан баланың аяқ киімі ұшып кеткен. Анасы оны шұлығынан танып қойған.

Марқұмның жақындары көлікті облыстық мәслихат депутатының ұлы тізгіндегенін айтты.  

«Анасы қазір ештеңе айта алмайды. Жалғыз ұлынан айырылды. Көлік жүргізушісінің туыстары апат күні де, жерлеуіне де келді. Әзірге жүргізушіні кешіре алмаймыз. Жиенім оқиға орнына барып, сұрастыра бастағанда ол балаларға жолдан өтуді үйрету керек деп айтыпты» деді Әділеттің әпкесі.

Қазір ҚР Қылмыстық кодексінің 345-бабы бойынша сотқа дейінгі тергеу басталған.

«Көлік жүргізушісі Ақтөбе қаласы полиция басқармасының уақытша қамау изоляторына қамалды» деді Ақтөбе облысы баспасөз қызметінің басшысы Ерболат Сарқұлов. 

Жүргізушінің кінәсі дәлелденсе, ол бес жылға сотталуы мүмкін. Бірақ марқұм Әділеттің анасы кінәлілер жеңіл жазамен құтылып кете ме деп қорқады. Ол енді Президенттен көмек сұрауға ниетті.