Депутат Назарбаевтың өкілетін қысқартуды не үшін қолдағанын айтты

Тұңғыш президент Нұрсұлтан Назарбаевқа есткерткіш қоюды ұсынған Мәжіліс депутаты Мәди Ахметов Елбасының өкілетін алып тастауды не үшін қолдағанын айтты.

Парламент ғимаратында «Азаттық Радиосы» Мәди Ахметовтен жауап алды.

– Бұл жерде мен ашқандай қарама-қайшылық көріп тұрған жоқпын. Бұл – заңды процесс. Заң бір қатып қалған дүние емес. Мына болып жатқан саяси жағдайларға байланысты оған өзгерістер енгізіледі, – деді жас депутат.

Сонымен қатар, ол Назарбаевқа ескерткіш қою керек деген ұстанымы туралы айтты.

– Ұсыныс айтылды. Бірақ бұл қойыла ма, қойылмай ма? Бұл болашақтың еншісінде. Уақыт көрсетеді, – деп түйіндеді Ахметов.

Еске салсақ, Мәжіліс депутаттары «Тұңғыш Президент – Елбасы туралы» Қазақстан Республикасының Конституциялық заңына сенаторлар ұсынған түзетуді мақұлдады.

Түзетуге сәйкес, аталған заңнан сыртқы және ішкі саясаттың негізгі бағыттары бойынша бастамалар Елбасымен келісіледі деген норма алынып тасталды.

Мәжілістің жалпы отырысына 93 депутат қатысты. Барлық 93 депутат бірауыздан бұл норманы алып тастауды қолдады. Олардың қатарында бұған дейін Алматыда Нұрсұлтан Назарбаевтың ескерткішін орнатуды ұсынған Мәжілістің ең жас депутаты Мәди Ахметов те бар болған еді.