Депутат Нұртөре Жүсіп Ирина Қайратовна тобына қатысты пікір білдірді

Сенат депутаты Нұртөре Жүсіп жақында Ирина Қайратовна тобына қатысты пікір білдірді. Ол Қазақстанда мемлекеттік рәміздерді қорлағаны үшін жазаны қатаңдатып, өнер қайраткерлерінің репертуарына цензура қою керектігін алға тартты.

Сондай-ақ, депутат әдепсіз сөздер айтып, халықты сыйламай, есірткі мен ішімдік ішкен әншілерді бес жылға дейін сахнадан мүлдем шеттетуді ұсынды.

«Мәдениет министрлігі жанынан репертуарлық алқа және республикалық, облыстық көркемдік кеңестер құрылсын. Бұқаралық мәдени шараларды өткізу талабына халықтың салт-дәстүрі мен әдет-ғұрпын сақтау және құрметтеу ережелерін енгізуді, осы талаптарды бұзған шығармашылық ұйымдардың қызметін бес жылға шектеуді талап етеміз. Депутаттық сауалға жазбаша жауап беруіңізді сұраймыз» деді Нұртөре Жүсіп премьер-министр Әлихан Смайыловқа.

Сондай-ақ, Нұртөре Жүсіп «Мәдениет туралы» заңға жекелеген шығармашылық өкілдерінің мәдени-көпшілік шараларын ұйымдастырушының халық алдындағы жауапкершілігін қамтамасыз ететін баптарды енгізуді ұсынды.

Еске салсақ, артынша музыканттар өздерінің әдепсіз қылықтары үшін кешірім сұрап, айыппұл төледі.