Депутат мектеп оқушыларына арнайы сабақ өткізуді ұсынды

Мәжіліс депутаты Дархан Мыңбай Қазақстанда ажырасулардың көбейіп кеткеніне назар аударды. Елде күн сайын 150 жұп ажырасады. Бұл тенденциямен күресу үшін мәжіліс депутаты мектептер мен жоғары оқу орындарында арнайы сабақ енгізуді ұсынды.

Бұл туралы Orda.kz хабарлайды.

– Бүгінгі таңда өте маңызды мәселенің тамыры жастардың ажырасуында, отбасылардың ыдырауында жатыр. Тұрақты отбасын құру, көп балалы болу ұлттың ұлғаюына негіз болады.

2015 жылдан 2019 жылға дейінгі кезеңде тіркелген некелердің жалпы саны 709,6 мыңды құрады, ал ажырасқан отбасылар саны - 274,5 мың. Яғни, тіркелген некелермен салыстырғанда ажырасулар саны 35 пайыздан 43 пайызға дейін өскен. Соңғы 5 жылда күніне барлығы 389 неке тіркелді, 150 отбасы ажырасты, - деді Мыңбай Мәжіліс отырысында.

Оның айтуынша, 2019 жылы 59 796 неке бұзылған, яғни бір күнде 164 отбасы ажырасқан. Биыл 120 мыңға жуық адам неке қиды, 60 мыңнан астамы 18-35 жас аралығындағы жастар. Ажырасудың басым бөлігі 30-34 жас аралығындағы отбасыларда болады.

Ұсыныс ретінде депутат тұрақты отбасы институтының құндылықтарын насихаттау үшін мектептер мен жоғары оқу орындарында арнайы сабақтар енгізуді ұсынды.