Дана Нұржігіт: Құмар ойынға қатысты заңға өзгеріс енгізу керек

Парламент сенатының депутаты Дана Нұржігіт ойын бизнесі туралы заңнаманы жетілдіру бойынша бірқатар шаралар ұсынды.

Сенатордың айтуынша, депутаттардың атына азаматтардан букмекерлік кеңселерді жарнамалауға қатысты заңнамалық шаралар қабылдау талабымен көптеген өтініштер келіп түседі.

«Жарнама туралы қолданыстағы заңға сәйкес казино мен интернет-казино қызметтерін жарнамалауға тыйым салынады. Бірақ букмекерлік кеңселердің қызметтерін жарнамалауға тікелей тыйым жоқ. Сондықтан мұндай компаниялардың жарнамалары интернетте агрессивті түрде алға жылжуда. Осы фактіні ескере отырып, қолданыстағы заңнамаға букмекерлік компаниялардың жарнамасына толық тыйым салу бойынша тиісті өзгерістер енгізу қажет» делінген депутаттық сауалда.

Сенатордың мәліметінше, Қазақстанда құмар ойыншылардың саны 350 мыңнан асады, ал бір ойыншының орташа қарызы 10 млн теңгеге жеткен. Депутат бұл мәселеге де назар аударуды сұрады. Ол сондай-ақ ойын бизнесі субъектілерінің әлеуметтік жауапкершілігін күшейту бойынша тиісті жұмыстар жүргізу қажеттігін атап өтті.