Депутат кредиттік амнистия жариялауға ұсыныс тастады

Депутаттар ҚР премьер-министрінің бірінші орынбасары Әлихан Смайыловқа қаржылық қиындықтары бар қазақстандықтардың несиесін кешіру туралы ұсыныспен сауал жолдады.

«Ақжол» партиясының депутаты Азамат Әбілдаев қазіргі таңда 27 пайыз халық қарызға батқанын айтты.

«Банктер мен МҚҰ несие беріп, халыққа көмектесіп жатқандай көрінеді. Бірақ ақшаны қайтарар кезінде түсіністік танытпайды. Олар өз аттарын таза ұстап қалу мақсатында, халықтың соңғы тиынын тартып алу үшін коллекторларды жұмсайды. Бүгінгі күні банктер жанашырлық, мейірімділік сияқты құндылықтардан ада болған және олар қарақшылардан да жаман. Соңғы ақшаны ұры да алмайды дейді ғой, ал банктер керісінше әлеуметтік көмек пен зейнетақыға да қол сұғады. Мұндай жағдай адамды соңғы қадам жасауға – суицидке баруға итермелейді» дейді депутат.

Олар Тәуелсіздіктің 30 жылдығы қарсаңында қаржылық қиындықтары бар қазақстандықтарға рақымшылық жасауға және коллекторлық компаниялардың қызметін реттеуге ұсыныс тастады.

«Қылмыс жасап сотталғандарға рақымшылық жасап жатқан мемлекет неге мүгедектікке немесе қиын жағдайға байланысты материалдық қиындықтарға тап болған азаматтарымызды қамқорлыққа алмайды? Олар да біздің қоғамның бір мүшесі болып саналады емес пе?! Неліктен бар болғаны 199 млрд теңге бөліп амнистия жасамасқа? Бұл мемлекет үшін көп ақша емес қой» деді Әбілдаев.

Еске салсақ, бұған дейін желіде тұрғын үй несиелеріне несиелік амнистия жарияланды деген ақпарат тараған. Алайда, оны Қаржы нарығын реттеу және дамыту агенттігі жоққа шығарды.