Депутат Ермұрат Бәпиге әлі диагноз қойылмады

Еуропаға медициналық диагностикаға барған мәжіліс депутаты Ермұрат Бәпи елге оралды. Қазір ол жергілікті шипажайлардың бірінде Германия дәрігерлерінен қорытынды диагнозды күтіп отыр.

Бұл туралы Ермұрат Бәпи Orda.kz тілшісіне айтты.

Ермұрат Бәпи тілшімізге елге оралғанын, қазір шипажайлардың бірінде саумалмен емделіп жатқанын растады. Ол әлі де неміс дәрігерлерінен қорытынды диагноз күтіп отырғаны жайлы бөлісті. Депутат бірнеше күннен кейін емделуге шақыру алуы керектігін және нәтиже келгенше өзінің жағдайы туралы айтудан бас тартатынын айтты.

Сонымен қатар Бәпи өзінің денсаулығына қатысты анонимді телеграм-каналда тараған жалған ақпараттарды жоққа шығарды. 

Еске сала кетейік, шілденің 20-сы күні Ермұрат Бәпидың бір кездері марқұм ресейлік оппозиционер Алексей Навальный емделген Берлиндегі әйгілі «Шарите» клиникасына диагностикаға барғанын хабарлаған едік.